梁珊昨日（7月1日）與世長辭，享年81歲，兒子證實噩耗。
“梁珊逝世網民熱議” 「御用惡女」梁珊昨日（7月1日）與世長辭，享年81歲。噩耗由資深電視製作人楊紹鴻於社交平台率先披露：「突然收到你兒子Alex通知你尋日突然離開嘅消息，實在不敢相信，前一排仲一齊食飯，我哋仲約好⋯⋯點知……親愛的珊姐，一路好走⋯⋯」其後梁珊兒子宇澄向傳媒證實母親離世消息。去年梁珊仍中氣十足接受鍾慧冰訪問，狀態極佳，離世消息震驚圈中好友。網民紛紛留言悼念，大嘆人生無常：「80歲仲咁精靈，話走就走，真係好突然！」
楊紹鴻悲痛發文：前排仲約好食飯 約定再見變永別
梁珊兒子宇澄透過傳媒發表聲明：「我們最敬愛的珊姐已於昨日（7月1日）與世長辭。非常感謝昨晚各方親友的慰問與關懷。有關珊姐後事的具體安排，我們稍後會再逐一通知大家。在此特別感謝大家的關心，並衷心祝願大家身體健康，平安順遂。珊姐兒子宇澄敬上」。
楊紹鴻在社交平台上載與梁珊的昔日合照，字裡行間盡顯悲痛：「突然收到你兒子Alex通知你琴日突然離開嘅消息，實在不敢相信，前一排仲一齊食飯，我哋仲約好⋯⋯點知……親愛的珊姐，一路好走⋯⋯永遠懷念同你合作嘅日子⋯⋯」。據了解，梁珊近年已回流香港定居，經常與圈中好友見面。楊紹鴻指早前才跟梁珊食飯，甚至彼此還有未完的約定，豈料噩耗來得太突然，令他難以置信。網民紛紛留言：「人生真係無常，前一排仲見佢精神咁好，話走就走。」亦有網民感慨：「80歲仲keep得咁好，以為佢可以長命百歲。」
入行半世紀「惡女專業戶」橫跨三大電視台 刁太呂魔頭成經典
梁珊在1945年出生，1960年代加入香港左派電影公司出道，初入行主力拍國語片。她不僅做演員，連場記、副導演和剪接工作也有去學，可謂多才多藝。其後她先後效力麗的電視、無綫電視及亞洲電視三大電視台，是少數服務過香港三大電視台的演員。
1979年，梁珊加入無綫電視並主演長篇電視劇《天虹》，與阿姐汪明荃及Do姐鄭裕玲同台演出。初入行拍電視劇時，她對電視台的製作方式並不熟悉，曾坦言：「最好笑慣咗拍電影有個導演喺鏡頭前同你講對白，拍電視劇只係聽到把聲唔知喺邊，導演原來喺Panel房，嗰時都未知咩叫Panel，覺得自己幾烏龍。」
在無綫工作多年期間，她參演了多部經典劇集，包括《天龍八部》（飾演段譽生母刀白鳳）、《新紮師兄續集》、《再見十九歲》、《奔向太陽》等。其中1982年《天龍八部》的刀白鳳一角，她演活了高貴與剛毅，成為早期版本中最令人難忘的刀白鳳之一。90年代初，梁珊轉投亞洲電視，演出《李小龍傳》、《我和春天有個約會》等劇集。
電影方面，她最為人熟悉的是《精裝追女仔》中飾演張敏媽媽「刁太」，以及在《富貴逼人》中飾演電視台高層「呂魔頭」。這兩個角色將她「御用惡女」的功力發揮得淋漓盡致，成為一代觀眾的集體回憶。直到1999年，梁珊突然沒有再拍戲，淡出幕前並到加拿大生活。
花名「降落傘」惡過阿姐！苗僑偉改完佢冇反對
梁珊在行內有個花名「降落傘」。文頌嫻笑指「傘」大過「遮」，即是代表梁珊是「大姐大」。楊紹鴻補充表示：「知道電視圈阿姐（汪明荃）已經好大啦，佢仲大過阿姐，所以叫佢做『降落傘』。」鍾慧冰亦解釋：「佢正直愛出頭，因為大過阿姐，惡過阿姐，乜都講，見唔啱就講。」
梁珊曾透露「降落傘」是1984年拍《楚留香之蝙蝠傳奇》時由苗僑偉所改。她說：「我就唔敢認，佢哋話最大把遮係咩遮？我話我係Fruit Punch嗰把，佢就話唔係，係佢哋噏之嘛，我又冇同意，不過我又冇反對，咁未算囉，同人拗咩啫？」
梁珊多年來快人快語，試過拍攝外景時細聲提醒導演機位反了，結果傳出去被人說她多嘴，但她態度隨性，覺得都是工作上的事，從不放在心上。除了做演員，梁珊有一段時間更在電影學院擔任講師。
去年最後露面極精靈！每周做四次瑜伽保養
梁珊最後一次公開露面是去年5月尾接受鍾慧冰YouTube節目《冰姐的花樣人生》訪問。當時已經80歲的她留着一頭短髮，穿上灰白色長袖上衣，胸前掛有金色大型飾物，顯得十分時尚。她氣色絕佳反應極快，外貌凍齡，獲網民大讚外貌與實際年齡完全不符。
鍾慧冰大讚她看起來很後生，梁珊笑言不用「動刀動槍」（醫美），一直有做運動，每周做四次瑜伽，還有跳印度舞。她更自爆在媽媽肚裡12個月才出世，先天營養充足：「身體好，我好多謝我媽媽，你知唔知我係陀12個月出世，入咗醫院3次都生唔出，跟住出嚟似人哋孖胎，好大隻、成身毛，仲要有牙仔添，我老豆話又係女呀，嘆氣，我媽講我知。我先天營養好足，係咪要多謝我阿媽！」
梁珊在訪問中透露，自己從小已想入演藝界，但遭家人反對，要她完成學業才可以入行。她說：「我爸爸係律師，媽媽係婦產科畢業學生，本來爸爸諗住喺香港開間幼稚園畀我打理，但係我同爸爸講，我都係對娛樂圈有興趣，爸爸話驚我學壞，我就同佢約法三章，我保證你個女兒一定會出於污泥而不染，我到今時今日都好對得住爸爸。」她亦澄清從未宣布退出幕前，無奈表示：「唔知點解冇人搵。」
大量網民激讚她保養一流：「梁小姐保養太好！轉數及表達同年輕的時候一模一樣！好厲害！」、「梁珊仍然很美麗！絕對是一個自愛，自強，自信的女人！」
網民熱議：80歲仲咁精神話走就走
梁珊離世消息震驚網民，社交平台湧現大量悼念留言。有網民慨嘆：「又一個經典綠葉走了！以前睇《富貴逼人》成日見佢，好記得佢個惡樣。」亦有網民感慨：「80歲仲keep得咁好，以為佢可以長命百歲，真係世事無常。」有網民分享去年睇完她的訪問：「上年睇完佢訪問仲好精神，點解突然就冇咗？」
有網民提到她息影多年的經歷：「1999年突然消失冇拍戲，原來係去咗加拿大，後來回流香港，以為佢會再出嚟拍嘢，點知等唔到。」更有人提及她的花名：「『降落傘』呢個花名真係好貼切，佢喺圈中地位真係好高。」
