曾志偉73歲生日搞哈利波特魔法派對，過百港星北上深圳賀壽，譚詠麟摟肩唱《一生中最愛》令志偉當場淚崩！
卸下TVB總經理重擔嘅曾志偉，踏入73歲後完全變咗「自由人」，生活精彩過以前。近期“曾志偉73歲生日”，仲拉大隊北上深圳五星級酒店搞哈利波特主題派對，過百明星北上賀壽，譚詠麟上台獻唱《一生中最愛》，仲摟住佢肩膀喊出「一生嘅好朋友曾志偉，一生中最愛」，搞到曾志偉當場淚崩。除咗深圳嘅魔法派對，佢仲喺香港搞慈善齋宴籌款逾300萬，邱淑貞驚喜現身拍賣，子女三代同堂力撐。早前佢隨明星足球隊北上惠州踢慈善賽，上陣一分鐘就因波鞋氧化「甩底」仆低，嚇呆苗僑偉同譚詠麟，事後自嘲「老貓燒鬚」，連官方小紅書都抽水抽到癲。曾志偉離開TVB後，話自由好多，「而家終於可以亂咁講嘢」，更透露未來想復出拍喜劇，同觀眾再見面。呢位「獎門人」嘅退休生活，真係有排睇。
惠州踢波「甩鞋底」 上陣1分鐘即仆低 老友抽水笑到收唔到聲
卸任TVB總經理後嘅曾志偉，生活過得相當充實，到處玩樂成日俾網民野生捕獲。早前（4月25日），佢隨香港明星足球隊北上惠州參加公益邀請賽，同老友譚詠麟、苗僑偉等人一齊喺球場上重溫昔日奮鬥情懷。身穿8號球衣嘅曾志偉雖然身形唔及當年靈活，但依然喺場上努力奔跑穿插，展現「寶刀未老」嘅姿態。
但比賽期間卻發生搞笑又尷尬嘅一幕。曾志偉喺帶球進攻嘅時候，身體突然失去平衡，整個人重重咁摔喺草地上，嚇呆咗在場嘅苗僑偉同譚詠麟。正當大家擔心呢位73歲嘅前輩係咪受傷之際，曾志偉自己企返起身，原來罪魁禍首係佢對波鞋「舊疏戰陣」——鞋底喺比賽途中突然氧化脫落，導致佢跣腳，無奈被逼提早離場。
目睹全過程嘅譚詠麟，起初都被嚇到呆咗，得悉係波鞋「甩底」後，即刻忍唔住指住對方大聲恥笑，老友鬼鬼真情流露。曾志偉賽後亦忍不住自嘲：「上咗一分鐘，哈哈！」仲攞起已經脫底嘅波鞋解釋：「隻鞋爛咗啊！對鞋氧化咗，成個甩底啊。」而「香港明星足球隊」官方小紅書事後亦出Po大玩抽水，寫道：「台下十年功，上場一分鐘。喂！志偉哥！你隻鞋爛咗啊！」引來大批網民瘋狂派Like。不少網民留言：「70多歲還能上陣已經好厲害」、「TVB人工低到鞋都唔捨得買喎」，有網民更佩服志偉已73歲身體依然硬淨。
「自由人」大嘆退休生活 5度辭職呻TVB高層壓力大 未來計劃復出拍喜劇
回顧今年初，曾志偉喺《萬千星輝頒獎典禮2025》上宣布卸下TVB總經理一職，自爆原來已經請辭5次，公司多次挽留，最後佢覺得已經培養好一班年輕人接班，先正式功成身退。佢坦言最難頂嘅係朝九晚五返工準時開會，「在TVB，每個星期起碼有4天要開會，早上9點鐘就要回公司，好累的」，而家做返自由人之後生活舒服好多，笑稱重獲自由，「冇束縛終於可以亂講嘢」。佢話TVB係「好大的郵輪」，但自己始終適應唔到文職管理工作，做總經理令佢不能亂講笑，「TVB是上市公司，不可以亂講，咁不如做番個自由人，對我來講冇束縛，反而能夠帶更多快樂畀觀眾」。
曾志偉喺任內令TVB轉虧為盈，佢自評呢5年表現值50幾分：「對行政不是做得好，好多事很想做亦未做到，最大的成功是觀眾覺得現在TVB的節目好睇，廣告返晒嚟。」佢透露未來計劃重返電影圈拍戲，希望整合運動、音樂與旅遊業進行跨界聯動，首要目標係拍喜劇，「大家生活緊張又辛苦，入戲院睇開心故事最能夠紓壓」，更呼籲觀眾多多入戲院支持香港電影。佢笑稱仔女早就想「炒老竇魷魚」，仲嚇佢話「做夠未呀？」，言談間盡顯退休生活嘅輕鬆自如。
哈利波特魔法壽宴仲有AI機械人伴舞！譚詠麟獻唱《一生中最愛》逼哭70歲硬漢
曾志偉近年每年生日都會搞慈善素宴加慶祝派對，不過今年佢就破格拉大隊北上深圳，喺五星級酒店包場搞咗場「哈利波特」主題生日派對，過百位圈中好友拖男帶女北上列陣賀壽，場面墟冚，盡顯娛樂圈大佬嘅驚人人脈。
派對現場佈置極具心思，從「9¾月台」嘅主題裝飾到放滿魔法棒同貓頭鷹造型甜品嘅精緻打卡位，仲有一個三層高嘅生日蛋糕，蛋糕上面特別寫上「平安喜樂」同「獎門人」嘅祝福語，充滿魔法氛圍。今年派對仲加入咗新潮玩意——現場竟出動一部AI機械人跟著音樂節拍熱舞，成為另類Party DJ，為傳統嘅壽宴增添咗科技趣味。
全晚最高潮嘅一幕，係相識幾十年嘅知己譚詠麟上台獻唱經典金曲《一生中最愛》，唱到動情處，佢摟住曾志偉嘅肩膀深情高呼：「一生嘅好朋友曾志偉，一生中最愛！」呢句真摯嘅情話瞬間擊中鐵漢心房，曾志偉聞歌即時感觸落淚，哭得不能自已，全場掌聲雷動。
當晚出席嘅嘉賓星光熠熠，苗僑偉夫婦、陳展鵬夫婦、吳啟華、梁漢文、謝天華、車婉婉、阮兆祥、TVB高層樂易玲等過百紅星齊聚一堂。特別嘅係，《中年好聲音》一班唱將周吉佩、支嚳儀、譚輝智等人亦專程北上到賀，場面之大足以媲美台慶，更反映了整個香港娛樂圈正向北遷移嘅新趨勢。
睇素宴邱淑貞戴百萬名錶驚喜現身 子女三代同堂齊賀壽
喺深圳魔法派對之前，曾志偉先喺香港會展中心舉行一年一度嘅「寺同道合慈善素宴2026」，筵開60多張枱，廣邀圈中好友齊聚慶生，同時結合慈善拍賣義賣活動。今年素宴為佛教團體籌得超過300萬港元善款，成績驕人。全晚最大亮點，就係已篤信密宗多年、平時鮮有露面嘅「一代女神」邱淑貞驚喜現身，仲上台擔任客串拍賣官，親自為活動募款出力。佢同曾志偉聯手拍賣一件內藏第25任茶巴法王珍貴肉身舍利嘅瑪嘠迦那「嘎嗚」聖物，最終以45萬港元成交，成為全場單件籌款最高嘅拍賣品。有眼利網民留意到邱淑貞手上佩戴嘅名貴腕錶價值超過百萬港元，不經意展露豐厚身家，即使素顏現身，但57歲嘅佢美貌依然令人讚嘆，貴為凍齡女神當之無愧。
最難得嘅係，當晚子女曾寶儀、曾國祥及平時極少露面嘅幼子曾國猷三代同堂現身力撐。曾寶儀與曾國祥更擔任拍賣司儀，一家人在台上一起切蛋糕、合唱生日歌，場面溫馨感人，盡顯家庭溫情。
近期網民熱議曾志偉卸任後生活豐富多彩，既北上踢波又頻繁搞大Show，譚詠麟笑指他「退休人工低到鞋爛都唔買」，曾志偉則反擊稱自己福壽綿長。呢位73歲「獎門人」嘅退休生活真係有排精彩。
