日本推理小說之神東野圭吾7月23日因大腸癌猝逝，享年68歲！
“東野圭吾離世網民不捨” 日本文壇投下震撼彈！曾以《嫌疑犯X的獻身》橫掃直木獎的推理小說巨擘東野圭吾，於7月23日凌晨因大腸癌猝逝，享年68歲。訃聞直到7月27日才由出版社講談社正式對外公布，令全球書迷措手不及。講談社在題為「東野圭吾先生逝世通知」的公告中寫道：「作家東野圭吾先生於7月23日凌晨，因大腸癌辭世，享壽68歲」。葬禮已由家屬以家族葬形式低調舉行，並呼籲外界「懇請避免採訪家屬」，同時婉拒一切奠儀、鮮花和弔唁信。
東野圭吾寫過嘅《白夜行》、《解憂雜貨店》、《神探伽利略》系列本本都係經典，全球銷量突破1億冊。佢唔單止係日本文壇嘅傳奇，仲係成代讀者嘅青春回憶。
「伽利略」最終章變遺作！福山雅治「最強拍檔」永別
講起東野圭吾，點可以唔提《神探伽利略》系列？物理學家湯川學每次用科學破案嘅英姿，配上福山雅治嘅神級演繹，真係型到爆。《伽利略》系列由2007年日劇播出開始瘋魔亞洲，湯川學嗰句「完全冇頭緒」同招牌手勢，成為一代人嘅集體回憶。該系列中的《嫌疑犯X的獻身》更於2006年勇奪直木賞殊榮。
東野圭吾原定今年8月5日推出《伽利略》系列第11部長篇《永遠的記憶》，作為系列30周年嘅紀念作。出版社講談社與文藝春秋指出，這部作品將成為大師留給全球書迷最後的珍貴遺作。出版社確認會如期於8月5日發行，等讀者可以喺書頁間同大師做最後嘅對話。
網民即刻崩潰：「湯川學冇咗老豆！」、「福山雅治嘅伽利略，以後再冇新故事。」有讀者感嘆：「之前仲有新書宣傳㗎，而家書都未出人就冇咗」。
由工程師到破億銷量之神 40年寫出106部經典
東野圭吾呢個名，本身就係一個傳奇。1958年2月4日出世於大阪市，畢業於大阪府立大學工學部電氣工學科。佢本來係汽車零件製造廠嘅工程師，利用工餘時間開始寫作生涯。1985年憑《放學後》贏咗第31屆江戶川亂步獎，正式出道。之後佢二話不說辭職全職寫作。
之後佢寫出《秘密》奪得第52屆日本推理作家協會獎、《白夜行》、《嫌疑犯X的獻身》贏得第134屆直木獎同本格推理大獎、《解憂雜貨店》獲第7屆中央公論文藝獎等經典。2014年《當祈禱落幕時》再獲第48屆吉川英治文學獎。2023年，佢嘅作品累計發行量突破1億冊，同年獲頒紫綬褒章同菊池寬獎。由出道到離世，40年間寫咗106部作品，全球翻譯至41個國家與地區出版，總發行量估計達1.68億冊，真係當之無愧嘅「推理之神」。
東野圭吾嘅創作生涯十分高產，後期筆鋒越發老辣，突破傳統本格推理套路，深入探討人心與社會議題，兼具娛樂、思考與文學價值。
改編影視多到數唔晒！福山雅治、木村拓哉都演過佢
東野圭吾嘅作品唔止喺書店賣到斷市，仲係影視圈最搶手嘅改編題材。《神探伽利略》由福山雅治主演，紅遍亞洲；《嫌疑犯X的獻身》中日韓三地都翻拍過；《白夜行》由山田涼介、堀北真希主演；《解憂雜貨店》有山田涼介、西田敏行，中國版仲有王俊凱、迪麗熱巴。《假面飯店》系列由木村拓哉主演，套套都係話題作。
東野圭吾嘅作品已被改編成數十部電影和電視劇，橫跨影視、縱貫東亞。佢嘅故事跨越國界，由日本紅到中國、韓國甚至歐美。2024年仲攞埋日本推理文學大獎。東野圭吾唔止係一個作家，仲係一個文化符號。
網民哭崩：湯川學嘅故事從此停筆
消息一出，社交平台即刻被悼念文洗版，迅速登上微博熱搜第一，熱搜前十大話題更有三個和東野圭吾有關。有讀者留言：「中學睇《嫌疑犯X的獻身》震撼到我而家都記得個結局。」「《解憂雜貨店》每次睇都會喊，東野老師點解咁快走？」「福山雅治嘅伽利略係我青春，而家連原作者都走埋。」「佢嘅書陪我過咗成個大學時期，RIP。」
亦有網民關注遺作安排：「好彩《永遠的記憶》會如期出版，至少仲有最後一本可以睇。」「8月5日，一定會買，當係同老師道別。」豆瓣上有讀者寫道：「平時總會調侃佢嘅書，但係見到呢個消息除咗震驚之外，仲會覺得推理小說界又隕落咗一顆十分明亮嘅星」。
講談社喺訃告中表示：「我們相信他創作的故事將繼續吸引眾多讀者。希望大家能夠繼續欣賞東野圭吾的小說。」東野圭吾筆下嘅故事，關於人性、愛同救贖，將會永遠留喺書頁之間。
